सुर्खेत । मंसिर २१ देखि २८ गतेसम्म वीरेन्द्रनगरको खुल्लामञ्चमा महायज्ञ लाग्ने भएको छ । यो महायज्ञ विशेषगरी मानवसेवा आश्रम सुर्खेतको भवन निर्माण गर्नको लागि लाग्ने भएको हो । आश्रयविहीनहरुलाई आश्रय दिने उेद्दश्यका लागि मानव सेवा आश्रमको आफ्नै भवन निर्माण गर्नको लागि यो यहायज्ञ लगाउन लागिएको महायज्ञ मूल आयोजक समितिका संयोजक डा. नवराज केसीले बताए ।
डा.केसीका अनुसार वीरेन्द्रनगर नगरपालिका–११, स्थित गंगामाला धार्मिक वन तथा देउती बज्यै सामुदायिक वनले मानवसेवा आश्रमको भवन निर्माणको लागि जग्गा उपलब्ध गराएको छ । उक्त जग्गामा भवन बनाउनका लागि आवश्यक पुँजी जुटाउन महायज्ञ लगाउन लागिएको उनले जानकारी दिए ।
भवन निर्माणका लागि डीपीआर तय भइसकेको छ । भवन निर्माणका लागि कर्णाली प्रदेश सरकारले चालु आर्थिक वर्षको बजेटमा १ करोड रुपैयाँ दिने घोषणा गरेको छ तर यहि रकमले भवन निर्माण गर्न प्रयाप्त नहुँने भएकाले महायज्ञ लगाउन लागिएको मानव सेवा आश्रमका केन्द्रीय अध्यक्ष रामजी अधिकारीले बताए ।
अहिले मानवसेवा आश्रम भाडाको भवनबाट सञ्चालित छ । ०७५ माघ १८ गतेदेखि सुर्खेतको वीरेन्द्रनगर नगरपालिका–१२ मा आश्रमले भाडाको घरबाट सेवा दिँदै आएको छ । हालसम्म ४ सय ६ जना बेसहारालाई उद्धार गरिएको आश्रमले जनाएको छ ।
महायज्ञ मूल आयोजक समितिका अनुसार सरकारको पुँजीले मात्र भवन निर्माण सम्भव नभएकाले समाजको पुँजी पनि यसमा लाग्नुपर्ने र पैसा मात्र नभइ सेवा गर्ने हातहरु पनि चाहिएकोले सात दिने महायज्ञमा भागवत भाष्कर कमलनयन गौतम प्रमुख कथावाचक रहने र सबै धर्म तथा परम्पराका पण्डित, गुरुहरूको सामुहिक उपस्थिति, राष्ट्रिय तथा स्थानीय कलाकारहरूको प्रस्तुति, नाटक, झाक्री प्रदर्शन लगायतका कार्यक्रम रहने छन् ।
महायज्ञ अवधिमा बिहान ५–७ बजेसम्म योगको कार्यक्रम गरिने छ । त्यसमा अन्तराष्ट्रिय स्तरको प्रशिक्षक आउने बताइएको छ । ७–९ बजेसम्म प्लस टु लेवका विद्यार्थीहरुलाई योग, प्रणायम, ध्यानको महत्वको बारेमा मानवता प्रवद्र्धन प्रशिक्षण दिइने छ । ९–११ सम्म ८, ९, १० कक्षाका विद्यार्थी, त्यसपछि बेलुका ४ बजेसम्म कथा वाचन र त्यसपछि ८ बजेसम्म स्थानीय तथा बाहिरबाट आएका कलाकारबाट भजनको कार्य हुने छ । महायज्ञमा सन्दुक रइत, कलाकार मदनकृष्ण श्रेष्ठ, हरिवंश आचार्य लगायतका व्यक्तिहरु पनि सहभागी हुने बताइएको छ ।
महायज्ञबाट ५ करोडको अपेक्षा
महायज्ञ मूल आयोजक समितिका सह–संयोजक सागर भुषालले भवन निर्माणका लागि महायज्ञबाट ५ करोड रुपैयाँ संकलन हुने अपेक्षा गरे । भवनमा सडक आश्रित मानवको उद्धार गरेर राख्नेमात्र नभई मानवसेवा बुझाउने मानवता अध्ययन केन्द्रको स्थापना गरिने लक्ष्य रहेको उनले बताए । ‘मानवता अध्ययन केन्द्रको रुपमा विकास गरिने परिकल्पना छ,’ उनले भने । साथै महायज्ञमा आउने गुरु, कथा वाचक, कलाकारहरुले पैँसा लिने छैनन् ।
झिल्को खबर । १९ मंसिर २०८१, बुधबार २०:४३