सुर्खेत । कालिकोट पचालझरना गाउँपालिका अध्यक्ष देवराज शाही ‘अग्नी’ले गाउँपालिकाको साझेदारीमा संचालन भइरहेका विभिन्न योजनाहरुको अनुगमन थालेका छन् ।
आइतवार प्रमुख प्रशासकीय अधिकृत कमल बहादुर बम र गाउँपालिका भित्रका विभिन्न शाखा प्रमुख सहितको टोलि लिएर पालिकाको वडा नं. ७ र ८ मा गाउँपालिकाको साझेदारीमा संचालन भइरहेका योजनाको अनुगमन गरेका हुन् ।
गाउँपालिका र आइएनफ संस्थाको साझेदारीमा निर्माण भइरहेको सिँचाई कुलो, तरकारी खेती, ओखर र स्याउँका विरुवाहरुको आइतवार अनुगमन गरिएको गाउँपालिका अध्यक्ष देवराज शाहीले जनकारी दिए ।
गाउँपालिकाको वडा नं. ७ नानिकोट र वडा नं.८ को मयकोट र काँडागाउँमा संचालनमा रहेका खानेपानी, सिचाँई कुलो,नहर, तरकारी खेती, विभिन्न फलफुलका बुट्टाहरुको अनुगमन गरिएको छ । साथै उक्त अनुगमनका क्रममा समुहहरुसित अन्तरक्रिया गरिएको र आगामी आर्थिक बर्षमा स्थानीयको गुनासाहरुलाई सम्बोधन हुँने गरी गाउँपालिका सरकारले बजेट निर्माण गर्ने गाउँपालिका अध्यक्ष देवराज शाही ‘अग्नी’ले जानकारी दिए ।
अनुगमनमा कृषि शाखा,भेट्नरी शाखा, रोजगार शाखा, उद्यम शाखा र प्राविधिक शाखाको समेत सहभागिता रहेको थियो ।
झिल्को खबर । १७ चैत्र २०८१, आईतवार १७:२०