सहकारी ठगी अभियोगमा पक्राउ परेका रास्वपा सभापति रवि लामिछानेलाई जिल्ला अदालत रुपन्देहीमा उपस्थित गराईएको छ। उच्च अदालत तुलसीपुर बुटवल इजलासको आदेश कार्यान्वयनका लागि उनलाई पक्राउ गरेर जिल्ला अदालतमा उपस्थित गराईएको रुपन्देही प्रहरीले जनाएको छ।
जिल्ला अदालत रुपन्देहीले लामिछानेलाई एक करोड धरौटीमा छाड्ने आदेश गरेपछि सरकारी वकिल कार्यालय र लामिछाने दुवै उच्च अदालत पुगेका थिए। जस उपर उच्च अदालत गत शुक्रवार सुनुवाई गर्दै लामिछानेलाई थुनामा पठाउने आदेश गरेको थियो।
पक्राउको चौथो दिन आज अदालत उपस्थित
अदालती प्रक्रिया मिचेर रविलाई पक्राउ गरेको प्रहरीले तीन रातसम्म हिरासतमा राखेर आज अदालतमा उपस्थित गराइएको छ । जबकि सार्वजनिक बिदाका कारण यसबिचमा अदालत बन्द रहने प्रहरीलाई थाहा थियो । रविलाई जिल्ला अदालत रुपन्देही लगेर अदालतको अनुमति लिएर कारागार चलान गर्ने प्रहरी तयारी छ ।
शुक्रबार पक्राउ गरिएका रविलाई काठमाडौंमा राखेर शनिबार बिहान हवाईमार्गबाट रुपन्देही लगेर जिल्ला प्रहरी कार्यालयमा बुझाइएको थियो । त्यहाँका प्रहरी नायब उपरीक्षक सुरज कार्कीले भने ‘२३ चैतमा सार्वजनिक बिदा परेकाले अदालत खुल्दाको बखत उपस्थित गराउने गरी प्रहरी हिरासतमा राख्नुपर्ने भएकाले थुनुवा पुर्जी दिइएको’ उल्लेख गरेका छन् । रूपन्देही प्रहरीको पुर्जीले पनि उनी पक्राउको प्रक्रिया नमिलेको रास्वपा नेताहरूको दाबी छ ।
झिल्को खबर । २५ चैत्र २०८१, सोमबार ११:३०