सुर्खेत । कर्णाली प्रदेशका मुख्यमन्त्री यामलाल कँडेलले भदौ २४ गते सुर्खेतमा भएका आगजनी, लुटपाट र चोरीका घटनालाई राजनीतिक दृष्टिले हेर्न नहुने बताएका छन् ।
बुधबार सुर्खेत आइपुगेका जाँचबुझ आयोगका सदस्य विश्वेश्वरप्रसाद भण्डारीसँगको भेटमा मुख्यमन्त्री कँडेलले आन्दोलनका नाममा सार्वजनिक र व्यक्तिगत सम्पत्तिमा क्षति पु¥याएर अपराध गरएको बताए । उनले आयोगलाई घटनाको निष्पक्ष अध्ययन गरी सत्य तथ्य सार्वजनिक गर्न सुझाव दिए ।
मुख्यमन्त्री कँडेलले विगतका राजनीतिक आन्दोलनहरूमा नागरिकको निजी सम्पत्तिमा आगजनी वा लुटपाट नभएको बताए ।
“अपराधलाई राजनीति भनेर ढाकछोप गरियो भने कानूनको शासन कमजोर हुन्छ र अराजकता बढ्ने खतरा रहन्छ । अब नागरिक नै असुरक्षित हुने अवस्था आउन सक्छ,” उनले भने ।
उनले अपराधमा संलग्न जो कोहीमाथि पनि कानूनअनुसार कडा कारबाही हुनुपर्नेमा जोड दिए । उनले जाँचबुझ आयोग र प्रहरी प्रशासनले सत्यतथ्य र निष्पक्ष अनुसन्धानबाट दोषीलाई कारबाहीमा ल्याएमात्रै यस्ता घटनाको पुनरावृत्ति रोक्न सकिने बताए ।
आयोगका सदस्य भण्डारीले निजी घर जलाउने कार्यलाई स्पष्टरूपमा आपराधिक गतिविधिका रूपमा आयोगले अध्ययन गर्ने बताए । उनले भने, “व्यक्तिगत घरमा आगजनी, लुटपाट र चोरी गर्ने कार्य राजनीतिक नभई अपराध हो ।”
जिल्ला प्रहरी कार्यालय सुर्खेतका प्रमुख प्रहरी उपरीक्षक सुधीरराज शाहीले घटनासम्बन्धी फोटो तथा भिडियो प्रमाण संकन गरिएको बताए । संलग्न व्यक्तिहरूको पहिचान अन्तिम चरणमा पुगेको र केही दिनभित्रै कानूनी कारबाही अघि बढाइने उनको भनाइ छ ।
झिल्को खबर । १३ कार्तिक २०८२, बुधबार १३:२३