सुर्खेत । नेपाली कम्युनिस्ट पार्टीका नेता झकबहादुर मल्लले कर्णाली प्रदेशका मुख्यमन्त्री यामलाल कँडेललाई आफ्नो पदको गरिमा कायम गर्न भनेका छन् । सामाजिक सञ्जालमार्फत सार्वजनिक गरिएको आफ्ना भनाइमा मल्लले मुख्यमन्त्रीले ‘पदको गरिमा कायम गर्न नसकेको’ आरोप लगाउँदै हालैका राजनीतिक गतिविधि र अभिव्यक्तिहरूमा तीव्र असन्तुष्टि जनाएका हुन् ।
मल्लले मुख्यमन्त्री कँडेललाई प्रधानमन्त्रीद्वारा बोलाइएको बालुवाटार बैठकमा सहभागी भएर चुनाव गराउन सहयोग गर्ने आश्वासन दिएको तर सुर्खेतमा आयोजित कार्यक्रममा भने “चुनावको वातावरण छैन” भन्ने अभिव्यक्ति दिएको भन्दै दुवै स्थानमा भिन्न–भिन्न कुरा बोल्नु पदको जिम्मेवारीविपरीत भएको टिप्पणी गरेका छन् ।
उनले हालका विरोध प्रदर्शनमा युवा घाइते तथा मृत्युभएका घटनामा प्रदेश सरकारले नैतिक जिम्मेवारी लिनुपर्ने र मानवअधिकार संरक्षणमा उदासीनता देखिएको आरोपसमेत लगाए ।
त्यस्तै, ‘लुटपाट र आगजनी अपराध भए पनि राज्य संयन्त्रबाट जनतामाथि भएको बल प्रयोगको राजनीतिक तथा नैतिक जवाफदेहीबाट मुख्यमन्त्री पन्छिन नमिल्ने’ भन्दै मल्लले कडा भाषामा प्रश्न उठाए ।
एमाले नेतृत्वप्रति टिप्पणी गर्दै उनले परिवर्तनका आन्दोलनहरूमा एमालेको ऐतिहासिक भूमिका रहेपनि अहिले पार्टी नेतृत्वमा ‘अहंकार’ हावी भएको दाबी गरे। उनले मुख्यमन्त्री कँडेललाई कुनै पनि बहानामा चुनावबाट पछि नहट्न र “कर्णालीका युवाहरूको बलिदानबाट प्राप्त पदको मर्यादा जोगाउन” आग्रह गरे ।
झिल्को खबर । ३० कार्तिक २०८२, शनिबार २०:३४