सुर्खेत । सुर्खेतको पंचपुरी नगरपालिका–५ स्थित श्री सरस्वती विद्या निकेतन इङ्गलिस बोर्डिङ स्कुल, बाबियाचौरको एक होस्टलमा कक्षा ५ मा अध्ययनरत १२ वर्षीया बालिकामाथि होस्टेल संचालकले नै जबरजस्ती करणी गरेका छन् ।
जिल्ला प्रहरी कार्यालय सुर्खेतका सूचना अधिकारी प्रहरी नायब उपरीक्षक माहेनजंग बुढथापाले बालिका माथि जबरजस्ती करणी गरेको आरोपमा होस्टेल संचालक ४० बर्षीया महेन्द्र आर्याल पक्राउ परेका छन् ।
प्रहरी उपरीक्षक बुढथापाका अनुसार घटना ४ मंसिर राति करिब ९ः०० बजे भएको हो । पीडित बालिकालाई ललाई–फकाई जबरजस्ती करणी गरिएको जानकारी प्राप्त भएपछि प्रहरी कार्यालय बाबियाचौरमा उजुरी दर्ता भएको थियो ।
उजुरीपछि प्रहरी निरीक्षक भूपेन्द्र शाहीको कमाण्डमा खटिएको पाँच जनाको टोलीले फरार रहेका आरोपी आर्याललाई राति १२ः०० बजे बाँचकाँडा भन्ने स्थानबाट लुकेर बसेको अवस्थामा पक्राउ गरेको हो ।
आरोपीलाई पक्राउ गरी इलाका प्रहरी कार्यालय सुर्खेत बाबियाचौरमा राखेर थप अनुसन्धान भइरहेको जिल्ला प्रहरी कार्यालय सुर्खेतले जानकारी दिएको छ ।
झिल्को खबर । १० मंसिर २०८२, मंगलवार १३:५८