सुर्खेत । प्रतिनिधिसभा चुनाव नजिकिँदै गर्दा राष्ट्रिय राजनीति अनिश्चिततामा डुबिरहेको बेला नेकपा एमालेले आगामी फागुनमा तय गरिएको निर्वाचन ‘नहुने सम्भावना’ भन्दै नयाँ राजनीतिक समिकरणको संकेत दिएको छ ।
एमाले महासचिव शंकर पोखरेलले शनिबार सुर्खेतमा पत्रकारहरुसँग कुरा गर्दै पार्टीले ‘चुनाव अनिश्चितता’लाई राजनीतिक रणनीतिका रूपमा अघि बढाएको स्पष्ट पारेका छन् ।
पत्रकार सम्मेलनमा पोखरेलले चुनावको तयारी बाहिरबाट हेर्दा देखिएजस्तो सहज नभएको दाबी गर्दै देशमा “नयाँ शक्ति सम्पर्क र षड्यन्त्र” चलिरहेको आरोप लगाए । महासचिव पोखरेलले वर्तमान राजनीतिक अस्थिरता, संविधानविपरीत कदमहरूको श्रृंखला र सरकारका गतिविधिले आगामी प्रतिनिधिसभा चुनाव हुँनेमा संका व्यक्त गरे ।
पोखरेलले भने, “देशलाई चुनावको नाम दिएर थप संकटतिर धकेल्ने प्रयत्न भइरहेको छ। एमाले असम्भव चुनावको पछाडि लाग्दैन ।” उनले सरकार गठनदेखि संसद विघटनसम्मका प्रक्रियामा एमालेले निरन्तर प्रश्न उठाइरहेको उल्लेख गरे ।
महासचिव पोखरेलले विघटित प्रतिनिधिसभालाई पुनः सक्रिय बनाएर नयाँ सहमति निर्माण गर्नुपर्ने धारणा राख्दै संसद विघटनको निर्णयलाई ‘राजनीतिक रूपमा अस्वीकार्य’ भने । उनले पूर्वप्रधानमन्त्री केपी शर्मा ओलीले गरेको संसद विघटनलाई सर्वोच्च अदालतले गलत ठहर गरेको उदाहरण दिँदै अहिले पनि संसद पुनःस्थापनाको सम्भावना रहेको दाबी गरे ।
त्यसैगरी उनले जेनजी आन्दोलनपछि सामाजिक सञ्जालमा ठूलो संख्यामा ‘फेक एकाउन्ट’ सक्रिय गरिएकाले आन्दोलनको वास्तविक प्रभाव कमजोर परेको टिप्पणी गरे।
यता, एमालेले हाल युवा मतदातालाई लक्षित गतिविधि तीव्र रूपमा अघि बढाइरहेको र “स्थिरता तथा संविधानिकता” को एजेन्डालाई अगाडि सारिरहेको बुझिन्छ। तर निर्वाचन हुने–नहुने बहसको बीचमा अन्य राजनीतिक दलहरूले भने निर्वाचन आयोगको निर्देशनअनुसार चुनावी तयारीलाई निरन्तरता दिइरहेका छन् ।
झिल्को खबर । ३० कार्तिक २०८२, शनिबार २०:०९