काठमाडौं । उज्यालो नेपाल पार्टीले मंसिर १७ गते पार्टीको घोषणासभा आयोजना गर्ने भएको छ । काठमाडौंमा शुक्रबार पत्रकार सम्मेलनमार्फत उक्त पार्टीले मंसिर १७ गते पार्टी घोषणासभा आयोजना गर्ने जानकारी दिएको हो ।
‘उक्त घोषणासभा २०८२ मंसिर १७ गते प्रज्ञा भवन, कमलादी, काठमाडौंमा आयोजना गरिनेछ । कार्यक्रममा वृहत जनसहभागीता रहने अपेक्षा राखिएको छ,’ पार्टी प्रवक्ता राजु थापाले भने, ‘सुरक्षा, सवारी तथा भीड व्यवस्थापनका तयारीहरू लगभग अन्तिम चरणमा पुगेका छन् । कार्यक्रमका प्रमुख अतिथि मन्त्रीसमेत रहेका कुलमान घिसिङ हुने थापाले बताए ।
‘उज्यालो भविष्यका लागि, उज्यालो नेपाल’ मूल नाराले देशको राजनीतिक, आर्थिक र सामाजिक रूपान्तरणलाई एउटै साझा राष्ट्रिय लक्ष्यका रूपमा प्रतिविम्बित गर्ने पार्टी प्रवक्ता राजु थापाले बताए ।
पार्टी घोषणासभामा उज्यालो नेपाल पार्टीको दीर्घकालीन दृष्टि, मूल उद्देश्य र विस्तृत घोषणापत्र–२०८२, औपचारिक रूपमा सार्वजनिक गरिनेछ, जसमा पार्टीको सैद्वान्तिक दृष्टिकोण, प्राथमिकता र कार्ययोजना प्रस्तुत गरिनेछ ।
दलमा आवद्ध हुन चाहनेले आवेदन दिन पनि उज्यालो पार्टी नेपालले आह्वान गरेको छ ।
झिल्को खबर । १३ मंसिर २०८२, शुक्रबार १४:२७