गैरआवासीय नेपाली संघ (एनआरएनए)को एकता महाधिवेशन काठमाडौंमा हुने भएको छ । एनआरएनए उच्चस्तरीय समितिद्वारा सोमबार आयोजित पत्रकार सम्मेलनमा २० वैशाखदेखि काठमाडौंको ह्यात होटेलमा महाधिवेशन हुने जानकारी दिइयो ।
समितिका संयोजक डा. शेष घलेले लामो समयदेखि विवादमा अल्झिएको संघलाई एकताबद्ध गर्दै महाधिवेशनबाट समस्या समाधान हुने बताए । ‘विवादरहित संंस्था बनाउन सर्वोच्चले दिएको परमादेशका आधारमा संस्थालाई आवश्यक सुधार गर्न महाधिवेशन हुँदै छ,’ उनले भने, ‘निष्पक्षताका लागि लड्नैपर्ने रहेछ । अब नयाँ ढंगले एनआरएनए बनाएर अगाडि बढ्नेछौँ ।’
एकता महाधिवेशन उच्चस्तरीय मूल समितिका सदस्यसचिव रविना थापाले एनआरएनए उच्चस्तरीय समितिको वेबसाइटमा १६ हजारभन्दा बढीले सदस्यका लागि आवेदन दिएको जानकारी दिइन् ।
‘उच्चस्तरीय समितिलाई पठाइएको संख्या हेर्दा उक्त संख्या ४७ हजारभन्दा बढी रहेको छ । उच्चस्तरीय समितिको वेबसाइट र एनसिसीहरूबाट आएको संख्या जोड्दा ६३ हजारभन्दा बढी सदस्य बन्नुभएको छ,’ उनले भनिन्, ‘एकता महाधिवेशनमा प्रतिनिधिका रूपमा सहभागी हुन आइतबारसम्म दुई हजार पाँच सयभन्दा बढीले निवेदन दिइसकेका छन् । आवेदनका लागि मंगलबारसम्म समय रहेको छ ।’
झिल्को खबर । ९ बैशाख २०८२, मंगलवार १२:४३