सुर्खेत । चीनमा सुरु भएको चौथो एसियन पारा खेलकुद अन्तरगत भएको ब्याडमिन्टन खेलमा नेपाली खेलाडी प्रकाश अधिकारीले विजयी सुरुवात गरेका छन् ।
पारा ब्याडमिन्टन एसएल ४ समुह अन्तर्गत पुरुष सिंगल्समा प्रकाशले विजयी सुरुवात गरेका हुन् । शुक्रबार भएको खेलमा उनले इराकका अली अलसादीलाई २–१ ले पन्छ्याएका थिए ।
प्रकाशले अलसादीलाई २१–१९, १९–२१ र २१–१९ ले पराजित गरे ।
पारा ब्याडमिन्टन एसएल ४ समुह अन्तर्गत एसियाकै कान्छा खेलाडी समेत रहेका प्रकाशले शनिबार पाकिस्तानका वाकस अख्तरको सामना गर्नेछन् ।
पारा ब्याडमिन्टनका लागि कुनै पनि नेपाली प्रशिक्षक नरहेको अवस्थामा प्रकाश प्रशिक्षक बिना नै एसियन गेम्स जस्तो ठूलो प्रतियोगितामा प्रतिसपर्धा गरेका हुन् ।
सुर्खेतका स्थायी बासिन्दा प्रकाश प्रथम पारा ब्याडमिन्टन खेलाडी हुन् । नेपालले पहिलो पटक पारा एसियन खेलकुदको ब्याडमिन्टनमा सहभागिता जनाएको हो । प्रकाशले यस अघि पारा अन्तर्राष्ट्रिय ब्याडमिन्टनका दुई ठूला प्रतियोगिताको समेत अधिकारीसँग अनुभव छ ।
झिल्को खबर । ३ कार्तिक २०८०, शुक्रबार १९:१३