कालिकोट । आगामी निर्वाचनलाई लक्षित गर्दै कालिकोट जिल्लामा चुनावी माहोल तातेको छ। पछिल्ला दिनहरूमा विभिन्न ठाउँमा आयोजना भएका सभा, भेटघाट तथा घरदैलो कार्यक्रममा महेन्द्र बहादुर शाहीको समर्थनमा उल्लेखनीय जनसहभागिता देखिएको छ ।
सदरमुकामदेखि ग्रामीण भेगसम्म आयोजित कार्यक्रमहरूमा स्थानीय बासिन्दाको बाक्लो उपस्थिति देखिनुले उनको पक्षमा जनलहर बढिरहेको संकेत गरेको समर्थकहरूको दाबी छ । विशेषगरी युवावर्ग र महिला समूहको सक्रिय सहभागिताले चुनावी अभियानलाई थप ऊर्जा दिएको छ ।
महेन्द्र बहादुर शाहीले आफ्ना चुनावी सभाहरूमा सडक, शिक्षा, स्वास्थ्य तथा रोजगारीलाई प्राथमिकतामा राख्ने प्रतिबद्धता व्यक्त गर्दै आएका छन्। उनले विगतका अधुरा विकास योजनालाई पूर्णता दिने र जिल्लाको समग्र विकासका लागि समन्वयात्मक पहल गर्ने बताएका छन् ।
यद्यपि, चुनावी मैदानमा अन्य प्रतिस्पर्धी उम्मेदवारहरू पनि सक्रिय रूपमा अभियानमा जुटेका छन्। राजनीतिक विश्लेषकहरूका अनुसार सभा–सम्मेलनमा देखिएको भीड मात्र निर्णायक नहुने भएकाले वास्तविक परिणाम मतदानका दिन मतदाताको उपस्थिती र मतगणनाले निर्धारण गर्नेछ।
कालिकोटमा चुनाव नजिकिँदै जाँदा राजनीतिक गतिविधि थप तीव्र बन्दै गएको छ। आगामी दिनहरूमा उम्मेदवारहरूबीचको प्रतिस्पर्धा अझ रोचक हुने अनुमान गरिएको छ।
झिल्को खबर । ३० माघ २०८२, बिहीबार १४:३१