सुर्खेत । कर्णाली प्रदेश सरकारका भूमि व्यवस्था, कृषि तथा सहकारीमन्त्री विनोदकुमार शाहले कुपोषण अन्त्यमा सरकारको ध्यान गएको बताएका छन्। मन्त्री शाहले कुपोषण मुक्त कर्णाली प्रदेशका लागि इनफ अभियानको प्रदेश स्तरीय शुभारम्भ कार्यक्रममा बोल्दै मन्त्री यस्तो बताएका हुन्।
‘बाल कुपोषण र भोकमरीको अन्त्य गरौं’ भन्ने नाराका साथ वल्र्ड भिजन ईन्टरनेशनलले आयोजना गरेको कार्यक्रममा मन्त्री शाहले कर्णाली प्रदेशमा पनि कुपोषणको समस्या रहेको बताए।
मन्त्री शाहले कर्णाली प्रदेशमा कुपोषण अन्त्यका लागि आवश्यक बजेट मन्त्रालयबाट प्रत्येक वर्ष विनियोजन भइरहेको बताए। उनले भने, ‘कृषि क्षेत्रको विकास अति आवश्यक छ। कृषिबाट उत्पादित अर्गानिक र गुाणस्तरीय बस्तुहरुनै कुपोषण न्युनिकरणमा महत्वपूर्ण भूमिका खेल्दछ। हामीसँग भुगोल, स्रोत साधान भए पनि हाम्रो माइन्ट मेकअप कृषितर्फ गएको छैन्। त्यसैले कर्णालीमा कुपोषणको अन्त्य गर्नका लागि कृषि क्षेत्रका विज्ञहरुले त्यता तिर ध्यान दिनुपर्छ।’
साथै मन्त्री शाहले कर्णालीमा ३६ प्रतिशत पुट्कोपन रहेको र त्यसको न्युनिकरणमा सरकार लागिरहेको बताए। कुपोषण अन्त्यका लागि सबै विकास साझेदारहरुलाई आ–आफ्नो क्षेत्रबाट सहयोग गर्नुपर्ने उनको भनाइ थियो। यस्तै, मन्त्री शाहले थालेका कामहरु इमान्दारीताका साथ हरेक पक्षबाट नतिजा आउन गरि गर्न जरुरी रहेको बताए।
यस्तै, कर्णाली प्रदेश सरकारको भूमि व्यवस्था, कृषि तथा सहकारी मन्त्रालयले खाद्य तथा पोषण सुरक्षा सम्बन्धी कार्यक्रम सञ्चालनका लागि आर्थिक वर्ष २०७९।०८० मा २३ करोड ३० लाख २० हजार, अव २०८०।०८१ म २० करोड ४८ लाख ९० हजार र चालु आर्थिक वर्षमा १४ करोड ३३ लाख ६८ हजार विनियोजन गरेको छ।
झिल्को खबर । ३१ श्रावण २०८१, बिहीबार १८:५७